Ch’i sa tractia d’ina fasa fitg delicata a reguard las tractativas cun l’Accademia Gualtiero Marchesi ha declerà il podestà da Poschiavo Alessandro Della Vedova ad RTR. Perquai na poss'ins era betg anc discurrer avertamain davart ils detagls dal dossier che la fundaziun aveva preparà per preschentar a la giunta da Poschiavo.
Dubis e malencletga
Divers commembers dal parlament n’hajan betg gì chapientscha pertge ch’ins na duess betg pudair tractar il dossier dal cuschinier dad 87 onns publicamain. Auters hajan er gì dubis pertge che tut ha dad ir uschè svelt. Gia ils 11 da settember vess la suprastanza communala da Poschiavo vulì tractar ina dumonda da credit en chaussa. Uss è quella tractanda stritgada da la glista, e cun quai èn las tractativas cun il locatari potenzial per las localitads da l’anteriur Centro tecnologico del legno a Poschiavo periclitadas.
Della Vedova privat
Sco che Alessandro Della Vedova ha declerà ad RTR na saja el betg pront da laschar crudar tut la lavur fatga e perder il temp e l’energia ch’el haja investì ils davos mais. Perquai fiss il president communal er pront da tractar vinavant cun la gruppa sin basa privata e dad ir en tschertga d’investiders potenzials. Quai per tuttina realisar anc il siemi dal cuschinier renumà. Numnadamain da finir il rintg da sia carriera là nua ch’el aveva cumenzà ella: en Svizra. Gualtiero Marchesi aveva fatg ses emprendissadi en l’Hotel Kulm a San Murezzan.
RR actualitad 07:00