Livigno sin territori talian, ha registrà gist al cumenzament da la pandemia 29 persunas malsaunas da Covid-19, uschia il «sindaco» Damiano Bormolini. Da quellas èn er pliras stadas ospitalisadas. El è dentant persvadì ch’il dumber da glieud ch'era infizada cun il virus senza ch’ins avess registrà quai, è bler pli aut. Quai causa che blers hajan curà l’infecziun a chasa ed ins n’haja era betg fatg ils tests.
Simplifitgar la relaziun da lavur
La Lumbardia haja grond retard cun furnir tests d’immunitad per las differentas regiuns. Perquai ha Livigno uss organisà sez entras in lavuratori a Morbegn tests d’immunitad. Quels vegnian fatgs sin basa voluntaria e custian radund 37 francs. L’interess saja surtut grond tar cunfinaris che lavuran en Svizra, ha ditg Bormolini envers RSI.
Nagina carte blanche
Il president communal da Livigno suttastritga er ch’il test d’immunitad na possia betg vegnir chapì sco garanzia generala. Dentant possia el dar ina tscherta segirtad als cunfinaris che van en tschertga da lavur ed er a las interpresas che vulan emploiar els. Fin il fanadur vul Livigno avair ina survista davart l’immunitad en la val che quinta radund 7'000 abitants.