Il Milestone è en emprima lingia in premi da turistichers per turistichers. Dentant: El è era in premi che vegn vis e renconuschì sur ils cunfins svizzers ora. Il premi sez è dotà cun 32’500 francs. Da survegnir in tal premi saja ina fitg grond'onur, di l’expert da turissem Bruno Gantenbain.
Gia be dad esser nominà per il Milestone è ina onur.
Ils dus victurs grischuns
Arosa saja sa sviluppà ils ultims onns intenziunadamain tar ina destinaziun d'event, uschia la giuria dal pli impurtant premi svizzer per il turissem.
Cun events vegnia persequità differentas finamiras, en il center stettia però d'augmentar il dumber da las pernottaziuns. Cun in team che na surpiglia betg mo pensums da destinaziun usitads, possia Arosa sa posiziunar sco destinaziun d'events.
«100% Valposchiavo» mettia en valur ils products regiunals per la purschida turistica. Grazia ad in’agricultura innovativa ed ina tradiziun culinarica che viva, disponia la Valposchiavo d’ina vasta paletta da products locals che vegnan per gronda part elavurads en la val, uschia la giuria. Quest avantatg nizzegia il project «100% Valposchiavo» per offrir als giasts ina experientscha culinarica.
Premis en trais categorias
Cun il premi Milestone onureschan htr hotel revule, hoteleriesuisse ed il secretariat statal per economia SECO prestaziuns extraordinarias, projects e persunalitads en la branscha da turissem svizra, quai èn las trais categorias «innovaziun», «persistenza» e «nova generaziun».
Tgi ha tut survegnì il premi Milestone?
| Onn | Project premià |
|---|---|
| 2016 | Arosa: Destinaziun d'events en ils culms grischuns |
| 2015 | 150 onns primascensiun Matterhorn |
| 2014 | Nua che Lucerna scriva istorgia(s) |
| 2013 | Jucker Farm – bains purils d'eveniment |
| 2012 | CabriO – emprima pendiculara cun tetg avert |
| 2011 | Pilatus – in culm investescha en il futur |
| 2010 | Grimsel – producziun d'energia idraulica e turissem |
| 2009 | Montreux Riviera – direcziun da la destinaziun |
| 2008 | SchweizMobil – promoziun da recreaziun activa en la natira en Svizra |
| 2007 | «Versehen Vergehen» – spectacul al liber a Vesperterminen (VS) |
| 2006 | Club Alpin Svizzer – strategia «eveniment alpin» |
| 2005 | Railaway – offertas favuraivlas da viagiar cun traffic public |
| 2004 | Restaurant «Chesa Pirani» a La Punt Chamues-ch da Daniel Bumann |
| 2003 | Mysterypark – parc da divertiment ad Interlaken |
| 2002 | Riders Palace – hotel da snowboard a Laax |
| 2001 | «Valais Excellence» – certificaziun ISO per turissem en il Vallais |
| 2000 | Switzerland Destination Management – plattafurma da reservaziun per telefon ed internet |
RR novitads 20:00 / RR actualitad 12:00