Moesano: Petiziun cunter firmas fictivas

Ina gruppa da privats enturn la deputada Nicoletta Noi-Togni che viva en la regiun ha rimnà 903 suttascripziuns. La finamira è da dar in signal a la regenza Grischuna.

Vista sin la Mesolcina. Bild in Lightbox öffnen.

Legenda da maletgs: Vista sin la Mesolcina. RTR

903 suttascripziuns ha ina gruppa da privats enturn la presidenta communala da San Vittore e deputada dal Cussegl grond Nicoletta Noi-Togni rimnà. La petiziun pretenda che la regenza prendia mesiras en connex cun las firmas fictivas (Briefkastenfirmen) che dattan gia dapi in temps da discutar en las valladas dal sid.

«  Nus pretendain che las controllas vegnian pli strictas e ch'i dettia ina tscherta analisa avant che las firmas vegnan registradas. »

Nicoletta Noi-Togni
deputada

Prendì encunter la petiziun ha il cusseglier guvernativ Jon Domenic Parolini. La regenza prendia per enconuschientscha la petiziun e guardia lura tge far. El punctuescha dentant ch'i vegnia gia uss prendì mesiras – quai aveva el er empermess durant la sessiun da l'october. I haja gia dà sedutas cun ils uffizis responsabels ed il schaner dettia quai lura ina sentupada cun las vischnancas pertutgadas. Er ellas stoppian dentant surprender responsabladad e na betg stuschar giu l'entira responsabladad al chantun, uschia Jon Domenic Parolini.

RR novitads 06:00