Cun quai vul la segunda instanza confermar la sentenzia dal tribunal da Sondrio, rapporta RSI. Numnadamain praschun a vita duranta per l’assassin da la Moldavia che ha mazzacrà il pèr da Zalende, ina fracziun da Brusio, il november dal 2010.
Nagin chasti per vita duranta
La sentenzia duai er restar tar 21 onns per l’incumbensader da l’omicidi, in um da 43 onns da la Vuclina. Auter che spetgà da la Procura publica da Sondrio n’han ins betg pretendì era in chasti a vita duranta per il Valtellinais.
Daners gea - mazzament na
Tenor il Tribunal d'assisas (Schwurgericht) da Milaun haja il Valtellinais cumandà a l’anteriur policist da la Moldavia, dad ir tar il pèr en la Val Puschlav e da extorcar daners, ma betg da mazzar las duas persunas. Cun questa conclusiun è era d’accord l’advocat dals ertavels dal pèr mazzacrà.
Nova sentenzia gia en in'emna
La sentenzia dal tribunal da Milaun vegn spetgada gia per la proxima audienza ils 27 da schaner 2016. Pussaivel fiss da trair vinavant il cas anc fin tar la terza ed ultima instanza en Italia, la Dretgira da cassaziun a Roma.