Tras la fusiun da l’ospital regiunal, la chasa per attempads e la Spitex duai ins pudair sfruttar meglier las sinergias tranter las diversas structuras. Quai surtut en il sectur da l’administraziun, tar la acquisiziun da material ed er tar il impiegar persunal.
Agir avant co stuair reagir
Il nov project duai permetter d’avair er en avegnir sut controlla ils custs. Inizià las tractativas per il project aveva la vischnanca da Poschiavo. Quai suenter ch’il departament da sanadad grischun aveva preschentà las directivas a reguard il provediment da la sanadad en il chantun.
Sco ch’il vice-president dal cussegl da fundaziun da l’ospital, Donato Fanconi, ha declerà ad RTR na duessan vegnir stritgadas naginas plazzas da lavur cun ina fusiun da las organisaziuns ch’èn tuttas da chasa a Poschiavo.
Nagina fusiun politica in vista
Per realisar il project vuli in cler gea da la populaziun proxim zercladur. E quai da tuttas duas vischnancas in Valposchiavo. Sco emprim pass in direcziun d’ina fusiun politica da Poschiavo e Brusio na poss’ins però betg encleger il consentiment probabel al project a l’urna.