Sut la marella èn differentas interpresas da construcziun en la regiun Moesa. Ils indizis per eventualas cunvegnas da pretsch ha la WEKO survegnì dal chantun Grischun. L'inquisiziun duai sclerir sch'i ha propi dà cunvegnas che violeschan las reglas da cartel. Tenor la communicaziun hai dà pliras perquisiziuns da chasas.
Detagls suondan proximas emnas
Il mument na dettia la WEKO betg enconuschent ils nums da las interpresas da bajegiar. Ins na sappia il mument anc betg tgi che saja propi involvì en chaussa, ha il directur da la WEKO Patrik Ducrey ditg sin dumonda da l'agentura AWP. En duas fin trais emnas vegnian ils nums da las interpresas dentant publitgads en il Fegl uffizial svizzer da commerzi. Quant extendida che l'inquisiziun da la WEKO è, sco er quant ditg che quella vegnia a cuzzar na tradescha il directur da la WEKO betg.
Puspè Grischun – WEKO sa mussa surstada
Ils ultims onns han ins adina puspè pudì leger lingias grassas davart cartels en Grischun. Diesch inquisiziuns davart cunvegnas da pretschs ha la WEKO gia fatg en Grischun. Tuttina na crai il vicedirectur da la cumissiun da concurrenza, Frank Stüssi betg ch'il Grischun è in chantun oraifer pertutgà, qua hajan ins constatà quai. Ins saja dentant stà surstà.
Che la WEKO fa danovamain investigaziuns tar firmas da construcziun en il Grischun na saja betg stà ina surpraisa. Quai di il cusseglier guvernativ Mario Cavigelli. La finala ha il chantun Grischun surdà a la cumissiun da concurrenza tscherts documents cun indizis. Tuttina saja el surstà, ch'i dettia tuttina anc cunvegnas.
