Siglir tar il cuntegn

Valladas talianas Pendiculara da San Bernardino cursescha puspè

Suenter ina pausa da 4 onns ha la societad «San Bernardino Impianti Turistici SA» puspè reactivà il manaschi. Dapi sonda ed anc enfin ils 15 d’avust cursescha la pendiculara sin l’Alpe Confin.

Pendiculara San Bernardino.
Legenda: Quatter onns è la pendiculara stada serrada. RTR, F. Belotti

Era l’enviern duess la pendiculara puspè cursar. Quai ha confermà Franco Ghezzi, il figl dal possessur da la pendiculara e commember dal cussegl d’administraziun da la «San Bernardino Impianti Turistici SA». Quants dals quatter runals dad ir cun skis che vegnan reactivads na saja per il mument betg anc cler. Planisà saja tranter auter da far ina part da «freeride», vul dir pistas che na vegnan betg preparadas.

Vischnanca beneventa reavertura

Il president communal da Mesocco Christian de Tann beneventa la reavertura da la pendiculara a San Bernardino. Ins vegnia proximamain a tschentar ensemen e discutar, sche la vischnanca da Mesocco possia sustegnair las pendicularas per il manaschi d’enviern. Quai ha Christian de Tann ditg sin dumonda.