La regenza ha prendì posiziun tar la charta averta da Nicoletta Noi-Togni dals 29 da december 2015 pertutgant la contaminaziun da l'aria en la part sut dal Mesauc.
Situaziun n'è betg nova
En sia resposta punctuescha la regenza, che la situaziun en la part sut dal Mesauc na saja betg nova. Las valurs autas da pulvra fina cunzunt durant l'enviern èn gia stadas l'object da differentas retschertgas da l'igiena da l'aria per eruir las funtaunas da la pulvra fina en la part sut dal Mesauc. Tut las retschertgas mussan en moda concordanta che la combustiun da biomassa (stgaudaments da laina) saja il motiv principal per l'impestaziun gronda da pulvra fina durant l'enviern.
Gia l'onn 2014 ha la regenza deliberà in studi da concept correspundent per in plan da mesiras regiunal per cumbatter l'impestaziun da pulvra fina en la part sut dal Mesauc. Las mesiras fixadas èn vegnidas concepidas en stretga collavuraziun cun las vischnancas pertutgadas. Il plan da mesiras per la part sut dal Mesauc vegn redigì actualmain da l'uffizi per la natira e l'ambient (UNA) en collavuraziun cun las vischnancas, cun la populaziun e cun las autoritads da scola ed è per part gia vegnì realisà.
RR novitads 10:00