Poschiavo: Cuschinier renomà ha interess per localitads dal CTL

In’opziun pussaivla saja, che «l’Accademia Gualtiero Marchesi» prenda dimora en l’edifizi dal Centro Tecnologico del legno CTL a Poschiavo. Quai ha confermà il president communal da Poschiavo, Alessandro Della Vedova ad RTR.

Els trais vi dad ina maisa. Bild in Lightbox öffnen.

Legenda da maletgs: Gualtiero Marchesi è er in dals gronds cuschiniers en il mund – Ferran Adria, Heston Blumenthal e Gualtiero Marchesi (da san.). Reuters

Che la vischnanca da Poschiavo haja tschertgà e contactà ils represchentants da «l’Accademia Gualtiero Marchesi». L'accademia, che porta il num dal cuschinier talian da renum internaziunal, avess interess dad instradar in'universitad en las localitads sper la staziun da Poschiavo.

Per entant be in’opziun

Detagls davart la finamira che «l’Accademia Gualtiero Marchesi» ha cun in nov lieu en la vallada taliana na dettia anc nagins, ha suttastritgà Della Vedova. Sco proxim vegnia elavurà in uschenumnà Businessplan. Quel vegnia suttamess il 11 da settember a la giunta da Poschiavo, il parlament da la vischnanca.

Sustegn intschert

Era betg cler saja sche la vischnanca da Poschiavo fiss pronta da sustegnair il nov project finanzialmain uschè sco ch’ella ha gia fatg tar il center da cumpetenza per lain Centro Tecnologico del legno CTL.

Tenor Alessandro Della Vedova dettia sper l’interess dal cuschinier talian er anc autras opziuns per duvrar las localitads dal CTL a Poschiavo en futur. Dentant saja tenor il podestà questa la meglra opziun.

Il Centro Tecnologico del legno ha gì da capitular suenter dus onns.

RR actualitad 17:40