Siglir tar il cuntegn
cuntegn

Valladas talianas Presidenta da vischnanca Bregaglia vul ir en Cussegl naziunal

Ils Liberaldemocrats dal Grischun han tschernì ina fatscha enconuschenta per lur glista principala per l'elecziun en ilCussegl naziunal. I sa tracta dad Anna Giacometti, presidenta da vischnanca da la Bregaglia. Ella è stada l'onn passà savens en las medias pervi da las bovas da Bondo.

Purtret dad Anna Giacometti.
Legenda: Anna Giacometti è pronta da candidar per il Cussegl naziunal. Keystone

Anna Giacometti sto dentant anc vegnir nominada da la radunanza da delegads da la PLD. La radunanza ha lieu ils 12 da favrer a Laax, ha communitgà la partida.

Er sin la glista principala da tschintg èn il cusseglier grond Michael Pfäffli da San Murezzan, la deputada dal cussegl grond da Cuira e scheffa da fracziun Vera Stiffler, Andreas Züllig da Lai, il president da la federaziun hotelleriesuisse, sco era il fiduziari Martin Bundi da Trin. Actualmain n'èn ils liberaldemocrats dal Grischun betg represchentads en il Cussegl naziunal.

RR novitads 20:00