La Repower fa il mument lavurs per augmentar la producziun da l'ovra idraulica Cavaglia sisum la Val Puschlav. Cun questas lavurs quinta il concern d'energia grischun che l'ovra vegn resguardada en il program da promoziun da la confederaziun.
Per pudair cuntanscher questa finamira dovria era renovaziuns vid l'ovra idraulica Palü, communitgescha Repower. L'ovra Cavaglia è da l'onn 1927 e tutga a la cascada d'ovras idraulicas Palü-Cavaglia-Robbia. Las lavurs custan total 2,5 milliuns francs e duran fin la fin da matg.
