Valladas talianas - Reto Raselli – Bio Grischun 2018 per sias ervas
Il pur dad ervas pustgiavin Reto Raselli survegn il premi Bio Grischun 2018. Il premi è vegnì surdà a la radunanza generala il venderdi a Landquart, scriva il Bündner Tagblatt BT.
Reto Raselli è cun la marca Erboristeria Biologica producent dad ervas en il Puschlav. El è enconuschent cunzunt pervi da ses tes biologics. Il premi è dotà cun 2018 francs – mintgamai tuttina bler sco l'annada da surdada. Quest onn è el vegnì surdà per la 14avla giada.
Era nominadas per il premi Bio Grischun 2018 eran la cuschiniera Rebecca Clopath da Lon e Cilgia Marti-Rauch da Sent che dat a fit parcellas per ierts.
