Il Cussegl federal ha approvà l’uschè numnà «fegl d'object» da la basa da helicopters a San Vittore. En quel vegn definì tranter auter il perimeter, las valurs da canera, sco er las mesiras da protecziun per natira e cuntrada. Per il manaschi sco tal na sa mida nagut, el duai cuntinuar sco fin d’uss, sco il Cussegl federal scriva. Vitiers vegn l’infrastructura renovada.
A Buochs mo pli aviuns civils
Il Cussegl federal ha er approvà la planisaziun da basa per l’eroport Buochs en il chantun Sutsilvania. Suenter che l’armada sa retira dal tut, duai l’eroport servir cumplettamain als basegns da l’aviatica civila.
Il manaschi cuntinuescha en il rom actual, cun resguardar en emprima lingia ils basegns da las interpresas sco il constructur d’aviuns Pilatus. Per il dumber dals sgols duai valair ina limita da 20’000 moviments.
RTR novitads 12:00