Segirezza al cunfin na va betg senza guardias da cunfin

Cun ina communicaziun a las medias ha il comitè «surregiunal ed independent d'ina partida per dapli segirezza en il Grischun dal Sid» fatg a savair la dumengia, ch'el saja «categoricamain» cunter in'ulteriura reducziun da plazzas tar il corp da guardias da cunfin.

Trais umens Bild in Lightbox öffnen.

Legenda da maletgs: Per il comitè da segirezza: Mario Salis, Alessandro Della Vedova e Maurizio Michael. MAD

Gist en il spazi da Schengen cun sias reglas liberalas saja la guardia als cunfins fitg impurtanta, scriva il comité. Perquai saja l'attenziun concentrada sin il corp da las guardias da cunfin, motivescha il comité sia communicaziun. Signà è ella da Alessandro Della Vedova (PCD Poschiavo), Mario Salis (PPS Engadin'Ota) e Maurizio Michael (PLD Bregaglia).

I na vegnia betg infurmà bain avunda, crititga il comité

En collavuraziun cun la polizia chantunala haja il corp prestà er il 2017 fitg buna lavur, lauda il comité. Ins pensia, ch'i na dettia «nagins problems a nos cunfins» quai na saja dentant betg uschia. Ils ultims mais sajan vegnids pigliads a Campocologno, Müstair e Martina radund 50 fugitivs e la populaziun n'haja badà nagut da quai.

Per far buna lavur vuli avunda guardias da cunfin

Cun quai ch'i dura onns, fin che las guardias da cunfin ha fatg lur furmaziun professiunala saja da guardar uss dad avair er in avegnir avunda forzas d'intervenziun.

Il comité sustegna perquai plainamain l'iniziativa dal chantun in chaussa. El renda dentant attent, che «quai na basta betg ed il squitsch ha da vegnir augmentà». Perquai veglia il comité inoltrar la sessiun da december ina moziun ed infurmar vinavant.

RR novitads 20:00