Siglir tar il cuntegn

Valladas talianas Soglio è la pli bella vischnanca da la Svizra 2015

Il public ha decidì en ina votaziun online che la fracziun en il sid dal Grischun è il pli bel lieu da la Svizra. En tscherna eran oriundamain 50 vischnancas ch’ina giuria aveva definì, spartidas en tut la Svizra, cun maximalmain 3'000 abitants.

bellas muntagnas
Legenda: La pli bella vischnanca svizra 2015 è situada en la regiun linguistica taliauna. A. Caprez

Passa 35'000 persunas sa hajan participadas a l’elecziun ha communitgà il magazin «l’illustrè» che ha organisà la concurrenza ensemen cun la «Schweizer Illustrierte».

9 vischnancas da l'entira Svizra avevan cuntanschì il final, numnadamain: Erlach, Guarda, Werdenberg, Charmey, Romainmôtier, Yvorne, Bosco Gurin, Corippo e Soglio.

Cursa denter Guarda e Soglio

En ina cursa piz a cup cun la vischnanca da Guarda ha Soglio finalmain cuntanschì l’emprim plaz. Sco che la presidenta communala dal Comune di Bregaglia, Anna Giacometti ha ditg ad RTR haja il fatg che la val ha survegnì dacurt gia il premi Wakker segir gidà a far daventar pli populara la Bregaglia ed animà da vuschar per Soglio sco pli bella vischnanca da la Svizra 2015.

L’organisaziun da la concurrenza vegn ad envidar ils 8 d’october 2015 ils 115 abitants da Soglio ad in aperitiv per far viva sin la victoria.