Siglir tar il cuntegn

Valladas talianas Spada da Damocles sur Bondo

Era sch'il Piz Cengalo resta quiet actualmain, i po rumper giu anc massas da material. Ma i dat era novitads legraivlas: la via chantunala sin il traject original vegn averta puspè ils 24 da november.

Glieud en ina sala
Legenda: La populaziun da la Bregaglia vegn infurmada. RTR, David Spinnler
Maletg d'ina punt, projectà vi da la paraid
Legenda: Preschentazioun davart il stadi actual da la via chantunala tranter Bondo e Promontogno. RTR, David Spinnler

La presidenta communala Anna Giacometti ed ils experts han pudì preschentar novas positivas a Vicosoprano per la populaziun da Bondo e da la Bregaglia. La via chantunala vegn averta puspè sin il traject oriund ils 24 da november, gist baud avunda per la stagiun d'enviern. Uschia po il traffic vers l'Engiadina passar sco usità.

Era il provediment d'aua per Bondo funcziuna puspè normal. Ed il batschigl che duai retegnair material da bovas è puspè svidà. Prest 500'000 meters cubic material han ils chavaterras ed ils camiuns transportà sin las duas deponias sper Bondo.

Il Cengalo è quiet, dentant...

Actualmain è il Piz Cengalo quiet. Quai ha ditg Martin Keiser da l'Uffizi da guaud e privels da la natira. A media e lunga vista possia dentant rumper giu anc ina giada tant material sco enfin ussa. Dimensiuns enormas sch'ins sa che be durant la stad passada èn ruts giu trais milliuns meters cubic crappa dal Piz Cengalo.

Ultra da quai ston ins far quint ch'ina ferma plievgia po puspè chaschunar bovas da plirs 100'000 meters cubic ch'arrivan enfin a Bondo. Lura avess dentant da bastar la capacitad dal batschigl a l'entrada da la vischnanca. Il batschigl è numnadamain ussa puspè vid.

RR novitads 06:00