Tractativas per Università Marchesi duain cuntinuar

Suenter ch'il cussegl communal da Poschiavo na vuleva betg tractar il tema davos portas serradas, ha el ussa tuttina surdà l'incumbensa a la suprastanza communala da cuntinuar cun las tractativas.

La fatschada d'ina chasa industriala da crap - davant ina pitga cun si las inizialas CTL per Centro Tecnologico del Legno. Bild in Lightbox öffnen.

Legenda da maletgs: Or da las localitads da l'anteriur Centro Tecnologico del Legno pudessi forsa tuttina dar ina universitad da cuschinar. RTR

Tar l'ultima sesida dal cussegl communal da Poschiavo la fin d'avust avevan ils commembers refusà la discussiun davart il project dal cuschinier famus talian Gualtiero Marchesi perquai che quella vess gì lieu davos portas serradas. Tar la sesida glindesdi saira han divers commembers però puspè prendì si il tema sut Varia.

La decisiun d'avant duas emnas na saja stada encunter il project mabain encunter il proceder han divers commembers ditg. Tenor els fissi donn da laschar passar questa schanza per la val.

Avert co enavant

La suprastanza communala ha prendì encunter l'incumbensa da prender si puspè las tractativas cun la gruppa enturn Gualtiero Marchesi ha il suprastant Orlando Lardi confermà ad RTR. Tar la proxima sesida glindesdi che vegn, vegnia decidì co enavant.

Tenor Alessandro Della Vedova saja la gruppa anc adina interessada da fabritgar si en l'anteriur Centro Tecnologico del Legno a Poschiavo in'universitad da cuschinar. Quai ha el ditg envers Il Bernina. Ins stoppia ussa guardar co las tractativas possian cuntinuar.

RR novitads 12:00