Motivs per il resultat negativ sajan dad ina vart ils giasts svizzers che han preferì da passentar lur vacanzas en pajais da l’euro nua ch’ils pretschs èn fin 20 % pli bass. Da l’autra vart patescha la Valposchiavo era dal fatg dad esser ina val da transit. Las colonnas d’autos che passan tras ils vitgs en direcziun da Livigno, la regiun ch’è deliberada da dazis, ed enavos na plaschan betg als abitants.
Era la purschida da la Viafier Retica che fa reclama per viadis bunmartgads da San Murezzan u da Cuira a Tiraun senza menziunar grond la Valposchiavo, chaschuna discussiuns animadas en val.
Da buna speranza èn ils turistichers uss che l’atun portia anc bunas cifras da pernottaziun. Tenor Kaspar Howald, il directur da «Valposchiavo Turismo» han ins da far quint cun in minus da 15-20 % per la stad 2015.
