Per la successiun dad Anna Giacometti a la testa da la vischnanca da la Bregaglia restan anc en cursa:
- Fernando Giovanoli, Soglio
- Maurizio Michael, Castasegna
- Marco Giacometti, Stampa
Els han annunzià lur candidatura er en il segund scrutini. Betg pli da la partida è Gianluca Giovanoli. Sia secziun da la PPS Bregaglia ha decis gia la dumengia saira unanim da betg pli nominar el.
En l’emprim scrutini per il presidi da la Bregaglia avevan tuts quatter manchentà la maioritad absoluta da 427. Las pli bleras vuschs aveva fatg Fernando Giovanoli cun 371 vuschs, avant il deputà Maurizio Michael cun 299 vuschs. Marcantamain pli paucas vuschs avevan fatg Gianluca Giovanoli (78) ed il frar da la presidenta en uffizi, Marco Giacometti (95). El ha confermà ad RTR da vulair candidar per l’uffizi er en la segunda runda.
L’elecziun dal nov president communal da Bregaglia è ils 28 da zercladur. En il segund scrutini vala la maioritad relativa.
