Suenter cifras alarmantas da -20% tar las pernottaziuns durant ils ultims 5 onns, vul ins reagir en la Val Puschlav. La purschida turistica duai vegnir pli enconuschenta ed in magnet per ils giasts, surtut ils svizzers che mancan. Funcziunar duess quai grazia a trais puncts d’attracziun specifics.
100% Valposchiavo
Uschia datti en 10 ustarias en val trais tratgs culinarics sur onn ch’èn producids cumplettamain cun ingredienzas indigenas. Ils gastronoms s’han obliads cun lur suttascripziun d’ina charta per il product 100 % Valposchiavo.
Novas sendas da bike
Per realisar novs biketrails en la Val Puschlav, ha il parlament da Poschiavo deliberà in mars in credit da 270’000 francs. La finamira è tranter auter da stgaffir sendas pli simplas che passan da tuttas duas varts da la val.
M13 bainbaud a Poschiavo
Ina da las attracziuns las pli novas questa stad vegn ad esser l’enconuschent urs M13 entant empaglià, che vegn mussà a partir da zercladur en il museum a Poschiavo a la publicitad. Per la nova exposiziun han ils puschlavins investì radund 180’000 francs.
L’avertura da l’exposiziun cun l’urs M13 è ils 11 da zercladur 2016 a Poschiavo.
