Siglir tar il cuntegn
cuntegn

Valladas talianas Via per Livigno interrutta suenter gronda bova

Venderdi saira s’ha distatgada ina massa da var 15’000 meters cubic material sur la via tranter il tunnel svizzer Punt dal Gall e la vischnanca da Livigno. La bova ha cuvrì ina part d’ina gallaria.

La gallaria da la via dal Gall zugliada da la bova
Legenda: La gallaria da la via dal Gall zugliada da la bova Livigno Scavi Srl

La bova ha ina largezza da fin 400 meters e cuvra bun 130 meters da l’emprima gallaria lung la via dal Gall en direcziun Livigno. Sin l’emprim’egliada na saja la gallaria betg donnegiada. Ch’ins saja dentant pir vi da las lavurs d’allontanaziun dal material, ha declerà il president communal da Livigno, Damiano Bormolini ad RTR. In inschigner saja actualmain vi da mesiraziuns davart la statica da la gallaria.

Coincidenza allegraivla

Cletg han ins gì che nagins autos eran en viadi cura che la bova è rivada da sur engiu. Causa lavurs da sanaziun e mantegniment en il tunnel da las Ovras Eletricas Engiadina (OEE) era quel serrà dapi la saira las 8. Tuttina saja la preoccupaziun stada gronda, ha agiunt Bormolini. Entant poss ins dentant excluder ch’ina persuna fiss restada sut las massas da crappa en la galaria.

3 maschinas en acziun sin il lieu

La via tras la galaria saja entant libra. Uss sajan trais maschinas vi dal chavar ed allontanar il material. Era quel sur e sut la galaria, cunquai ch’ins vul evitar ch’i dat problems durant l’enviern.

Cuntanschibel è il lieu talian actualmain be sur il pass da La Motta. La colliaziun tras il tunnel Punt dal Gall da las OEE e cun quai era la colliaziun da Livigno a Zernez, resta serrada almain fin damaun suentermezdi.

RR actualitad saira