Siglir tar il cuntegn

Header

audio
Alexandra Mischol viva dapi 12 onns vegan
Or da Actualitad dals 16.01.2023. Maletg: RTR
laschar ir. Durada: 4 minutas 23 Secundas.
cuntegn

Veganissem Alexandra Mischol viva dapi 12 onns vegan

Alexandra Mischol ch'è oriunda da Ramosch viva gia passa 12 onns vegan. Desister da products d'animals è per ella daventà mintgadi.

Il trend è cler: adina dapli persunas as nutreschan vegan – pia consequentamain senza products animalic. Ellas desistan tant da charn sco er dad ovs, chaschiel ubain latg. Ina dad ellas è Alexandra Mischol. Per ella sajan adina ils animals stads la raschun da desister da products d'animals.

Jau na vul betg ch'in animal sto patir pervia d'insatge ch'jau mangiel.
Autur: Alexandra Mischol vegana dapi 12 onns

Betg adina simpel

Cumenzà a sa nutrir vegan ha la dunna da 33 onns avant passa 12 onns. L'entschatta na saja quai betg adina stà simpel. Ella haja gia udì ina massa commentaris sco: «Vegetaric è gea en urden, ma vegan è in zic massa extrem». Er adina puspè saja ella vegnida dumandada, tge ch'ella possia alura anc mangiar sch'ella desistia cumplettamain da products d'animals. Entant dettia quasi en mintg'ustaria er opziuns veganas. Uschia stoppia ella mo darar sviar sin la schliaziun d'urgenza: pommes-frites e salata.

Er la schelta da products vegans en las stizuns saja daventada fitg vasta. Ils products sajan er marcads cleramain. Uschia na stoppian ins betg adina leger l'entira glista dad ingredienzas. Ella fetschia quai dentant anc adina, perquai ch'ella saja disada quai.

Mancanzas pussaivlas

Tgi che sa nutreschia vegan è en privel d'avair tschertas mancanzas, per exempel dal vitamin B12. Quel prendia ella sco aditiv alimentar. Ina mancanza da quel vitamin fiss fitg malsanadaivel. Alexandra Mischol va er mintga dus onns tar il miedi per laschar controllar sche ses corp ha avunda da tut quai ch'el dovra. Fin ussa saja adina tut stà en urden.

Jau hai plaschair che adina dapli glieud s’interessescha per il veganissem.
Autur: Alexandra Mischol vegana dapi 12 onns

Per quels e quellas che vulan cumenzar a sa nutrir vegan u che vulan ina giada empruvar ora quella filosofia ha ella in tip: Betg far memia cumplitgà e simplamain empruvar differents products fin ch'ins haja chattà per exempel il joghurt che gusta. Entant dettia ina schelta fitg vasta da products alternativs. Ina sfida saja magari anc da chattar chaschiel vegan.

Il chaschiel vegan d'avant 12 onns pudessan ins bunamain numnar ina «blessura corporala».
Autur: Alexandra Mischol vegana dapi 12 onns

Entant saja dentant er l'alternativa vegana per chaschiel daventada bler meglra. I dettia quasi per mintga vivonda er ina buna alternativa vegana.

RTR actualitad 08:00

Artitgels legids il pli savens