Velo - Il percurs da traffic a Cuira avert per la publicitad

En il stadion da l'Obere Au a Cuira ha la polizia construì in percurs da traffic che duai simular il traffic en la realitad. Construì quel han els cun vias da velo, vias principalas, signalisaziuns, rundellas, tablas da traffic, plazzals e stops. Pia, sco en realitad. Igl intent davos uschè in percurs da traffic è che uffants vegnian pli segirs sin il velo e vegnian en contact cun las reglas da traffic. Uffants dastgan numnadamain ir cun velo sin il passape fin 12 onns. Davent da 12 fissani obligads dad ir sin via, munta ch'i stuessan lura er savair co sa cumportar sin via amez il traffic.

Avant ch'i va liber per ils uffants, vegni mintga velo curt inspectà. Sche reflecturs manchian, sche mettian els vidlonder els. Sch'ils frains na funcziunan betg sco i duessan, emprovian els da pinar lez. Uschia sajan ils uffants pronts da sa participar en l'iert da traffic. Emprender stettia avant tut. A la fin dal di dettia nagin test, dentant saja impurtant ch'ils uffants hajan uschia era gia udì insatge da quai, pudì emprender insatge e trenar quai ch'igl han emprendì.

Il precurs da traffic stat er a disposiziun a la publicitad sco parc d'exercizi per velos.

Sa cunvegnir da midar direcziun

Per ch'ins percorschia sia intenziun, muss'ins adina ad uras la midada da direcziun cun stender il bratsch, cunzunt sch'ins vul ir a sanestra u en il traffic circular.

Partir a sanestra

Ins guarda enavos, dat in cler segn cun il bratsch vers sanester e sa storscha vers il mez da la via. Ins resguarda il dretg da precedenza e sa mova senza tagliar giu la storta. Sch’ins tema da vegnir surpassà, alura guard’ins anc ina giada curtamain enavos, avant che partir.

Traffic circular

Ins resguarda il dretg da precedenza sanester. Ins po charrar en rundellas entamez. Ins tegna distanza dals vehichels che passan davant mai e na varga betg en la rundella. Avant che bandunar la rundella dar in cler segn cun il bratsch vers dretg.

Cruschada cun ina strivla da velo

Vi da cruschadas han velocipedists e mopedists che charreschan vias da velo u strivlas da velos per lung da las vias la precedenza. Questa regla vala era sch'i n'ha nagina strivla da velo.