Il 2015 ha il pur ed interprendider da servetschs Stefan Jenny cumprà ina maschina dad 11 tonnas che po racoltar automaticamain las ivas da las vignas en il Signuradi. Ses intent: ils viticulturs da la regiun duessan prender a fit el ensemen cun sia maschina. En il fratemp fan però pir radund in terz dals 70 viticulturs dal Signuradi diever da quella purschida.
Il pli grond viticultur da la regiun Andrea Davaz dovra la maschina, ma be mintgatant e cun resalvas.
La maschina è buna sche l’aura è bella. Sche la pumaraida è donnegiada u sch’ella ha la drosofila da tscharescher daventa quai ina sfida per la maschina.
I dovria en scadin cas anc studis e retschertgas scientificas che mussan sche la racolta cun la maschina ha in’influenza sin la qualitad dal vin.
Blers viticulturs èn entant anc sceptics invers la maschina. La racolta a maun vegnia a restar impurtanta. Per ina pervi da la tradiziun ma er pervi che bleras vignas dal Signuradi èn memia stretgas per che la maschina po sa volver. Dentant er en questa branscha mancan las forzas da lavur, uschia che la maschina vegn a daventar en il futur pli impurtanta.