L'emprima intentziun dal rapport annual saja segir da mussar tge che l'uffizi fetschia, di il manader da l'Uffizi chantunal per la segirezza da victualias e d'animals, Giochen Bearth.
Nus vulain er mussar las persunas motivadas ch'èn davos quest uffizi.
Il rapport annual na dess dentant betg mo esser in palpiri cun ina massa cifras e rapports e preschantar il resultat da la lavur da l'uffizi.
Controllas da victualias: In process detaglià
Las controllas da victualias en il Grischun cumpiglian in vast spectrum da menaschis, da las ustarias fin a las fieras e la vendita directa sin bains purils. L'uffizi fa controllas regularas ed analisescha products en labors per garantir ch'els adempleschan las pretensiuns da qualitad. Las pretensiuns gist sch'i va per la declaraziun da victualias èn vegnidas pli autas e quai pretenda bler dals producents.
Malgrà las sfidas, la qualitad dals products è savens auta, cun las pli grondas difficultads tar la declaranza. Tar la sparta victualias s'auda er la controlla da l'aua da bogns cuverts. Il svilup negativ en la qualitad da l’aua en bogns cuverts è in tema che fatschenta.
L'onn 2024 n'ha l’aua betg ademplì las premissas tar 66% dals bogns controlladas. Las temperaturas autas e las pretensiuns da la higiena en centers da wellness fan il process da controlla pli cumplex. Malgrà ch'ils consuments èn pli pretensius, la mancanza da persunal en l’ hotellaria po influenzar la persistenza e la qualitad dals servetschs.
Reacziuns e mesiras
Per reagir sin ils svilups negativs, vegnan per exempel augmentadas las controllas, e l'uffizi furnescha infurmaziuns als menaschis. La publicaziun dals rapports saja in punct central. Quella duess sensibilisar ils menaschis, per exempel en l'hotellaria. Uschia as emprovia da motivar la branscha da prender mesiras pli severas per garantir la qualitad.
Conclusiun generala
Malgrà las sfidas, en il Grischun n'haja betg dà gronds scandals en il sectur da victualias durant l’onn 2024. Quai saja era d'attribuir a la prevenziun constanta e la sensibilisaziun dals producents e menaschis. L'accent sin novas tendenzas e la collavuraziun cun il sectur da la gastronomia e wellness restan prioritads per il chantun.
Mesiras preventivas cunter malsognas d'animals
L'onn passà è l'Uffizi chantunal per la segirezza da victualias e per la sanadad d'animals sa fatschentà cun mesiras preventivas intensivas cunter malsognas sco la grippa d'utschals e la pestilenza africana da pors ni la malsogna da la lieunga blaua.
Ins fetschia regularmain exercizis per esser preparà sin eventualas erupziuns da malsognas infectusas tar animals e collavuri stretgamain cun partenaris sco l'Uffizi da guaud e privels da la natira e l'Uffizi da chatscha e pestga ed er cun differents veterinaris en il Grischun.
