Simon Rageth quinta, che la situaziun sa megliereschia gia il mez da l’auter onn, cura che novs locomotivists hajan a fin la scolaziun. Il pledader da la Viafier retica quinta dentant betg, ch’ins stoppia sco tar la Viafier federala, annullar trens pervia da la mancanza da locomotivists. Actualmain haja mintga locomotivist en media 125 sururas. Per far frunt a la mancanza da locomotivists, haja la Viafier retica dumandà quels che veglian ir en pensiun anticipada, sch’els possian lavurar anc in pau pli ditg.
Betg pussaivel da reducir pensum da lavur
Dapi l’avrigl ha il persunal da la viafier retica in nov contract collectiv da lavur. Quel lubescha atgnamain al persunal da gudagnar dis libers entras reducir il temp da lavur sin 98 u sin 96%. Ma gist per ils locomotivists n’èsi il mument betg pussibel da far diever da quest nov model da lavur.
Tar il sindicat dal persunal da transport SEV, èn ins tut auter che intgantà da quai: Per Markus Cadosch, il secretari regiunal dal Grischun dal sindicat, èn gist bunas cundiziuns da lavur, la basa per persunal motivà. E gist per ils locomotivists, na stettian quels novs models da lavur betg a disposiziun, scriva il secretari sin dumonda da RTR.
Per la motivaziun na saja quai betg bun, vitiers vegnia, che las cundiziuns da lavur dals locomotivists na sajan oz era betg pli uschè bunas sco pli baud. Per il SEV saja dentant cler, ch’el s’engaschia cun tutta forza per meglras cundiziuns da lavur per ils locomotivists, uschia Markus Cadosch.
RR actualitad 17:40