Siglir tar il cuntegn

Header

cuntegn

Viafier retica I manca locomotivistas e locomotivists

In tren senza locomotivista u locomotivist – pon ins forsa imaginar per il futur. Il mument dentant, na va quai anc betg. Gist quels mancan il mument tar la Viafier retica. Sin 300 collavuraturas e collavuraturs mancan 10 – pia mintga 30avel. Quai munta lungs dis da lavur e sururas.

Il quint è atgnamain simpel: La Viafier retica ha adina dapli colliaziun da trens – pia dapli lavur. Perquai duvrassi atgnamain era dapli persunal. Lez manca dentant. Per l'ina perquai che blers e bleras van en pensiun e pli paucs vegnan suenter. Per l'autra vegn il mument anc l'unda da grippa vitiers. Tut quai pertutgia las conducturas, ils manevraders dentant cunzunt il persunal da locomotiva, di Markus Barth ch’è en la direcziun da la Viafier retica:

Tar autras gruppas da persunal pon ins pli tgunsch anc chattar soluziuns ch'i na dovra betg tant persunal, ma senza locomotivistas e locomotivists va il tren simplamain betg.
Autur: Markus Barth manader da la producziun tar la Viafier retica

E perquai ch'els n'hajan betg tant persunal sco giavischà, veglia quai dir: far sururas. Sco la Retica di haja mintga locomotivist e locomotivista fatg bunamain 50 sururas aifer il davos onn. Quai è circa in'emna dapli lavur.

audio
Mancanza da locomotivistas tar la Viafier Retica
ord Actualitad dals 21.12.2022.
laschar ir. Durada: 3 minutas 8 Secundas.

Segirtad saja tuttina dada

I dettia dentant grondas differenzas tranter il persunal. Intgins dad els hajan bunamain naginas sururas, auters enfin 150. Quai hajan els decis uschia en dialog cun las collavuraturas e collavuraturs, di Markus Barth. Ma malgrà ils lungs dis da lavur: La segirtad saja tuttina garantida. Quels che sesian a la testa dal tren garanteschian vinavant ch'ils viagiaturs vegnian segiramain dad in lieu a l'auter, di Markus Barth.

Quai di il sindicat latiers

Era sche la situaziun saja difficila, la Viafier retica fetschia gia bler per scolar e mantegnair sia glieud. Quai conferma era Markus Cadosch il secretari regiunal dal Sindicat per il persunal da transport. Els scoleschian mintga onn 20 locomotivists e locomotivistas ed hajan bunas cundiziuns da lavur.

La Retica saja pertscherta che quella stretga da persunal vegnia anc ad occupar ils proxims onns. Il persunal stoppia era vinavant quintar cun blera lavur ed era cun intginas sururas.

RTR Actualitad 17:00

Artitgels legids il pli savens