Mangiar e baiver en il traffic public è lubì – quai er cun obligatori da purtar mascrinas. La Viafier retica porscha schizunt in service da minibar. «Nus essan persvas che nus pudain porscher gastronomia en ils trens a moda segira», di Simon Rageth, pledader da medias da la Viafier retica. Ch'ins animeschia tras quai ils passagiers da prender giu las mascrinas per consumar bavrondas u tschaveras na lascha el betg valair. La Viafier retica s'orienteschia vi dal concept da protecziun naziunal per il traffic public. Tal lubeschia gastronomia en ils trens cun mesiras da protecziun.
Era per il chantun betg problematic
L'Uffizi da sanadad dal chantun Grischun appellescha, dad observar strictamain l'obligaziun da purtar mascrinas da protecziun en il traffic public. Tuttina na vesan ins betg sco problematic il service cun minibars en ils trens. Qua saja la responsabladad da mintgin e mintgina dumandada, declera Rudolf Leuthold, manader da l'Uffizi da sanadad. «Be perquai ch'ins ha said e prenda in schluc aua, na vul quai betg dir, ch'ins prenda giu la mascra per l'entir viadi. Ins na duess simplamain betg esser vid mangiar permanentamain da Cuira enfin San Murezzan, be per betg stuair purtar ina mascra. Quai na fiss betg il senn da la chaussa.» Las minibars n'hajan nagina influenza decisiva sin il purtar mascras, è el persvas.
Conducturs cun mascras, servients cun visiers
Anc la fin da l'emna vargada purtavan las persunas che servivan café e snacks visiers da plastic. Quai schebain che tals na protegian tenor la media chantunala, Marina Jamnicki betg a moda suffizienta dal virus. Tenor Simon Rageth haja la societad affiliada – che saja responsabla per la gastronomia en ils trens – midà quai. Uschia portan era questas persunas da nov mascras.