La notg hai navì en bleras regiuns dal Grischun – u ch'i ha dà per part plievgia intensiva. A Malögia han ins mesirà venderdi a bun'ura 42 centimeters naiv nova, ha SRF Meteo scrit sin Twitter. Uschè blera naiv n'hai mai dà là, l'enviern passà.
La blera naiv ha er chaschunà problems sin diversas vias, ed en spezial sin la ruta dal San Bernardino. L'autostrada A13 è stada a bun'ura serrada per rumir la naiv tranter Tusaun ed il tunnel dal San Bernardino, e vinavant fin a Mesocco.
Disturbis hai er dà tar la viafier
Era la Viafier retica è stada pertutgada. La lingia da la Viafier retica, tranter Trin e Versomi è stada interrutta oz a bun'ura. Igl è vegnì giu crappa sin ils binaris.
Privel da lavinas per part s'augmentà
La naiv nova ha era laschà crescher il privel da lavinas. In privel grond, stgalim 4 vala en la Bregaglia, en parts da l'Engiadin'Ota, ed en il Mesauc.