En Grischun è la situaziun puspè sa calmada suenter las navadas. Plirs vitgs ch'eran isolads èn puspè cuntanschibels. Uschia per exempel la Val Stussavgia. Lavinas na sajan fin uss betg vegnidas giu sin las vias ed er il dumber d'accidents sin via na saja betg stà extraorinari cun otg.
Vias serradas ed impediments:
- tranter Martina ed il cunfin
- tranter Vinadi e Spissermühle (sviament via Pfunds)
- pass dal Lucmagn è serrà ord raschuns da segirezza
Er ulteriuras vias lateralas èn anc serradas. Qua chattais Vus la survista detagliada da l'Uffizi da construcziun bassa.
La situaziun tar il traffic da tren
Sa calmada è er la situaziun sin la lingia da la Viafier retica. Pliras lingias èn puspè avertas uschia er quella tranter Susch e Zernez.
Trajects da trens interruts:
- Tavau Plaz e Filisur (nagin remplazzament pussaivel)
- sur il pass Alpsu - tranter Dieni ed Andermatt
Per persunas che viageschan cun il tren, recumonda la viafier vinavant da s’infurmar davart la situaziun actuala via urari online e da planisar en dapli temp per il viadi.
Grond privel da lavinas
En la gronda part dal Grischun regia il mument in privel da lavinas considerabel – stgalim 3 da 5. Per la vart dal nord dal Rain annunzia l'institut da naiv e lavinas a Tavau vinavant in privel da lavinas grond – stgalim 4. Quai annunzia l'Institut da naiv e lavinas a Tavau.
