Ollanda, Cuira vegn
La musica da la citad da Cuira fa part da la pli gronda occurrenza da marschar dal mund. Dals 15 enfin ils 22 da fanadur è la musica da la citad en l'Ollanda. Tranter ils participants èn er commembers da l'armada svizra e gardists svizzers. Accumpagnads e sustegnids vegnan els da la musica da la citad da Cuira e dal president da la citad Urs Marti.
Il marsch da quatter dis n’è betg in eveniment puramain sportiv. Er blera musica e preschentaziuns artisticas tutgan tar il program. La Musica da la citad da Cuira vegn a dar differents stans ed in concert da gala en la baselgia da Haalderen, plinavant vegnan las curridras ed ils curriders sustegnids cun musica.
Sin ils davos 6 kilometers sa radunan tuts e van ensemen en l'arrivada, er la musica da la citad da Cuira vegn a marschar.
Nov dirigent
Davide de Stefani è vegnì engaschà da la musica da Cuira extra per quest eveniment, cunquai ch’els avevan nagin dirigent pli. Davide de Stefani di che la glieud saja leda ed i vegnia ris bler. Quai saja fitg impurtant en ses egls. El abitescha en l’Italia e vegn quatter giadas ad emna en Svizra e quai per la musica. La damaun ensi e la saira engiu per puspè turnar tar sia famiglia. Cunquai ch’il program è grond, stoppia el anc ir in zic davos ils cudeschs.
Entaifer quatter emnas hai jau stuì emprender passa quaranta tocs.
Vierdaagse
Vierdaagse è l'occurrenza da marschar la pli gronda dal mund. Radund 45'000 participants da l'entir mund piglian part al Vierdaagse. Per survegnir ina distincziun ston vegnir absolvidas cun success quatter etappas d’in di sin la lunghezza da 30, 40 u 50 km che dependan da classas da vegliadetgna e da status (civil u militar). La lunghezza da las reglas è per umens tar 50 km (militar cun 10 kg bagascha da marschar: 40 km) e per dunnas tar 40 km per di; per juniors (fin 16 onns) e per seniors (a partir da 50 onns) valan etappas d’in di pli curtas.
Per l'emprima giada è il marsch da quatter dis vegnì organisà 1909 cun 300 participants. Entant viageschan mintg'onn passa in milliun carstgauns sco participants ed aspectaturs a Nijmegen per assister al spectacul.
