Siglir tar il cuntegn

Header

audio
Bunura: Cunter violenza: Violenza en la vegliadetgna capita pli savens che quai ch'ins pensa
Or da Actualitad dals 26.11.2019.
laschar ir. Durada: 3 minutas 41 Secundas.
cuntegn

Violenza cunter attempads «I dat ina gronda cifra zuppada»

La violenza a chasa è in tabu. Blers cas na vegnan mai a la glisch. Cunzunt tar violenza cunter attempads datti paucas cifras. L’Uniun naziunala independenta da mediaziun e dumondas en la vegliadetgna (UBA) smina ch’i dettia gist là ina gronda cifra zuppada.

La cifra naziunala da violenza a chasa s’augmenta mintg’onn dapi il 2012. L’onn passà ha la polizia registrà passa 18’000 cas en Svizra. Era en il Grischun crescha la cifra. Tenor la statistica chantunala n'han anc mai uschè bleras persunas fatg diever d’ina cussegliaziun en il connex cun violenza a chasa sco l’onn passà.

Tema da s’annunziar

Tar quellas statisticas – chantunal u federal – na vegn betg differenzià tranter vegliadetgna. Uschia na datti naginas cifras uffizialas en connex cun la violenza tar attempads. Tenor Ruth Mettler-Ernst, manadra da l’Uniun naziunala independenta per mediaziun e dumondas en la vegliadetgna (UBA), dettia gist là probabel ina gronda cifra zuppada. «Tenor la WHO è mintga 5avel attempà pertutgà ina giada en sia vita da violenza a chasa. Pia èsi pussaivel ch'enturn 300’000 attempads èn pertutgads en Svizra».

L’UBA sco era l’uniun AlterEgo e la Pro Senectute fan sforzs per vegnir a la glisch cun uschè blers cas sco pussaivel. En media registreschian els enturn 200 cas concrets da violenza a chasa cunter glieud pli passada.

Ins sa turpegia sch’ins na sa betg sa defender

I dat blers motivs daco che la glieud pli veglia n'ha betg il curaschi da tschertgar agid extern. Tenor Ruth Mettler-Ernst han ins savens tema da repressalias.

Ins sa turpegia da betg avair l’energia da sa defender sez.
Autur: Ruth Mettler-Ernst manadra da l'UBA

Sco per exempel da vegnir sfurzà dad ir en chasa da tgira u cun rumper giu il contact. Plinavant na sajan ins betg conscients da la seriusadad dal problem ed haja tema da provocar anc pli gronds conflicts.

Qua chattan pertutgads agid

Avrir la box Serrar la box

En Svizra datti intgins posts nua che glieud attempada chatta agid, sch'ella è pertutgada da violenza a chasa.

Hotline da l'uniun naziunala independenta per mediaziun e dumondas en la vegliadetgna (UBA) : 0848 00 13 13

Post da consultaziun en il Grischun: l'uniun Agid per victimas dal Grischun: 081 257 31 50

Era online datti differentas pussaivladads. Per exempel sut: www.alterohnegewalt.ch

RTR actualitad 07:00

Artitgels legids il pli savens