La vischnanca da Domat ha fatg l'onn passà in gudogn da bunamain 1,9 milliuns francs enstagl da la perdita budgetada da 360'000 francs. Quest fatg saja cunzunt d'attribuir a dapli entradas da taglia da persunas giuridicas ed a taglias extraordinarias, scriva la vischnanca da Domat.
Sper quai han era damain expensas en ils secturs furmaziun ed agid economic gidà a cuntanscher quest resultat positiv. Remartgablas sajan plinavant era las bleras investiziuns da la vischnanca cun intents impurtants sco abitaziuns per persunas attempadas u il santeri Sogn Gion, ma era la punt per il traffic plaun da Domat a Panaduz.
Concept da segirezza surlavurà pervia da concert da Nemo
In tema ch’era vegnì inoltrà per l’ura da dumondas aveva da far cun il concert da Nemo a chaschun dal festival «Viva Domat» ils 30 e 31 d’avust. Quest festival organisà da la gruppa «Great Eight» haja gia l’onn passà enritgì la vita culturala da Domat, scriva la vischnanca plinavant. Suenter il success da Nemo al Eurovision Song Contest haja l’occurrenza ussa però survegnì tut in'autra dimensiun er areguard la segirezza. Suenter il success da Nemo haja la vischnanca elavurà il concept da segirezza e discutà quel cun la Polizia chantunala. Quella prevesia d'esser preschenta cun dapli policistas e policists durant ils dis dal festival, uschia la vischnanca da Domat plinavant.