En vista als dis pli curts vegn la visibilitad da ciclistas e ciclists puspè pli impurtanta. Quella è dentant era prescritta: Tenor lescha stoppia ins avair adina in reflectur alv davantvart, in cotschen davos ed in oransch en tuttas duas direcziuns dal pedal. Cura ch’i vegn stgir prescriva la lescha plinavant ina glisch alva davant ed ina cotschna davos.
In exempel concret
Tenor Daniel Morgenthaler dal post da consultaziun svizzer per la prevenziun d’accidents (BFU) vesian ins ina ciclista u in ciclist cun vestgadira stgira e senza glisch u reflecturs be fin sin 25 meters. Quai è dentant gia la distanza ch’in automobilist dovria cun 45 kilometers l’ura per reagir. Pir 25 meters suenter che in automobilist vesia in velo, cumenzia el a franar. En quest cas cun consequenzas grondas e bler memia tard.
Ins sto dar en egl ad auters participants dal traffic.
Cun divers mez d’agid possian ins prevegnir talas situaziuns, di Daniel Morgenthaler. Vestgadira e chapellinas cun colurs traglischantas vesian ins bain durand il di e sche quellas han era ina funcziun da reflectur èn ellas era la notg visiblas. Buns reflecturs en ils gists lieus possian en cumparegliaziun cun l’exempel quadruplar la visibilitad.
Impurtant èsi era da vesair il velo da la vart.
Gists lieus sajan per exempel las chanvellas u la giugadira dal pe. Cun reflecturs vi da quels possian ins vesair era il moviment da ciclistas e ciclists. Era reflecturs da la vart dal velo sco per exempel vi dals pneus ouradis possian tenor Daniel Bachofner da l’uniun Pro Velo augmentar la visibilitad da ciclistas e ciclists.
Ils experts menziunan era che glischs da velo na duain betg tschorventar autras participantas e participants da traffic e che glischs supplementaras, sco vi da la chapellina, na sajan betg ina substituziun per las glischs obligatoricas vi dal velo.