Il president da la capitala da l'Ucraina Vitali Klitschko è turnà a Tavau. Gia l'onn passà è el stà al WEF per manar discurs e far attent sin la situaziun sgraschaivla en ses pajais. Quests discurs hajan purtà fitg bler en differents secturs, quai ha el ditg vers SRF.
Perquai è el er quest onn puspè turnà cun cleras pretensiuns e spetgas. Da la Svizra spetga el ch'ella saja pli proactiva e sustegnia las sancziuns encunter la Russia.
Ils daners che la Russia fa n'investescha ella betg en si'economia e ses pievel, mabain en la guerra.
Pretensiuns ha Vitali Klitschko er envers l'Uniun europeica, dad ella giavischa el cunzunt armas per pudair defender l'Ucraina. Actualmain n'hajan els nagin'autra pussaivladad che da sa defender e perquai dovrian els armas.
Blers discurs en vista suenter la guerra
A Tavau haja Vitali Klitschko gia pudì manar blers discurs cun represchentantas e represchentants da la politica e da l'economia. Cunzunt er en vista al «day after tomorrow», il di suenter damaun, il temp suenter la guerra.
Nossa gronda finamira è da stoppar questa guerra senza senn. Quai è il giavisch da mintga Ucranaisa e da mintga Ucrainais.
Suenter ch'il WEF da l'onn passà haja purtà bler a ses pajais è el persvas ch'er il WEF actual portia insatge a ses pajais. Cunzunt lura cura ch'i va per puspè bajegiar si il pajais suenter la guerra.
