Vivian Putscher - «Jau hai vulì sentir la natira»

Pliras giadas era la dunna da Samedan gia stada per in temp suletta en il guaud. En quest connex ha ella emprendì enconuschientschas da basa davart las abilitads da surviver en la natira. D'amis ha ella udì d'in project d'ina scola en l'America dal Nord, che dat la pussaivladad a sias participantas e participants da viver durant in onn or en il liber.

Uschia è ella viagiada il matg 2022 a Wisconsin, in stadi en l'America dal Nord, per viver giuadora cun ina pitschna gruppa da glieud fin la primavaira 2023. En tut sa cumponiva la gruppa da trais dunnas, in um ed ina persuna diversa. Adina puspè èn ulteriurs participants s'associads per in pèr dis u emnas a la gruppa.

Durant quest temp èn els restads per gronda part al medem lieu en in guaud ed han pudì viver adina meglier ordaifer. La gruppa ha emprendì da far fieu senza zulprins, da construir chasas or da material natiral e da cuschinar senza padellas sin il fieu avert.

Uschia avevan els suenter in tschert temp mo pli in satg da durmir, in pèr vestgids, ina sigir ed in cuntè. Las participantas ed ils participants han rimnà u chatschà sezs uschè bler nutriment sco pussaivel. Spezialmain durant l'enviern n'è quai betg uschè simpel, perquai han els survegnì supplementarmain nutriment d'ordaifer. 

Il contact cun amias ed amis e cun la famiglia han els pudì tegnair cun brevs. Plinavant han els pudì ir ina giada il mais tar il proxim vitg e duvrar là per intginas uras l'internet.

Era sche Vivian Putscher, che lavurava avant questa aventura sco dissegnadra da mesiraziun, s'ha legrà sin las muntognas en Svizra, ha ses return or da la natira era purtà intginas sfidas. Uschia èsi stà grev d'esser circumdà da mirs da chasa e da sa tegnair era puspè vi da l'ura. Ella ha vivì ed emprendì bler quest onn. Ina part da questa savida vuless ella dar vinavant en l’avegnir gugent en furma da curs ad auters.

Onn en la natira