Lantschà il cumbat electoral han els cun laschar sgular var 80 balluns – mintgamai cun in cedel d’infurmaziun – davent da la Quaderwiese a Cuira. Che l’acziun ha strusch attratg aspectaturs ed interssads n’ha betg disturbà ils organisturs. Els èn persvas ch’igl è uras da franar il svilup actual en las scolas grischunas e da reponderar ina u l’autra chaussa.
Structuras e cleras finamiras mancan
Tenor Marlies Klesse, mussadra da scolina e cun-inizianta vegnian las structuras en scola schliadas pli e pli cun las novas metoda. I na vegnia betg pli instruì pass per pass e cun cleras finamiras. Uschia emprendian ils uffants la finala pli pauc. Plinavant saja quest svilup influenzà da stentas internaziunalas d’unifitgar tut e betg pli orientà als basegns dal chantun u dal pajais.
Sco exempels per quests svilups numnan ils iniziants la Svezia, ils Stadis Unids u er l’Engalterra, nua ch’ins haja gia pli ditg sumegliants sistems e metodas da scola sco introducids ils ultims onns er en il Grischun. En quests pajais saja sa mussà, ch’il livel da furmaziun saja sa sbassà tras las refurmas. Els sa refereschan qua tranter auter sin la professra Svedaisa Inger Enkvist che persequitescha e cumpareglia gia dapi decennis sistems da scola da divers pajais.
Resuns or da la scolaziun professiunala
Ina da las raschuns principalas per ils iniziants da vegnir activs en chaussa èn resuns ch’els survegnan da responsabels per emprendistas ed emprendists.
Nus udin adina puspè: Ils giuvens na san nagut pli. Els na san gnanc ina giada pli scriver endretg ina construcziun senza sbagls. Els na san gnanc pli quintar a chau fin 100. Ad els stuain nus sco emprim mussar co lavurar e co emprender.
Cundecider ma betg surpigliar rolla d’experts
La finamira da las duas iniziativas saja da dar al suveran la pussaivladad da curreger all’urna in svilup en scola sch’el haja il sentiment che quel giaja en la fallada direcziun, e quai er tar plans d’instrucziun uschia Elisabeth Calcagnini. Lavurar or quels plans duain però er en l’avegnir persunas dal fatg.
I na va betg persuenter, ch’il pievel sa fatschenta uss cun cuntegns d’emprender u en tge classa ch’ins emprenda l’inagiain…
En quest connex na saja betg lur finamira da votar davart il Plan d’instrucziun 21, mabain da pudair curreger el e principalmain integrar cleras finamiras da l’onn e cuntegns che duain vegnir tractads. Er na duai la regenza tenor ils iniziants en l’avegnir betg pli pudair introducir ina tala midada da sistem senza preschentar quella al pievel e dar la pussaivladad da s'exprimer latiers.
RR actualitad 07:00
