La participaziun a las votaziuns dals 27 da settemeber è pli auta che tar autras votaziuns en il passà. Cunzunt la revisiun da la lescha da chatscha, las elecziuns communalas e l'initiativa da limitaziun carmalian ils votants e las votantas a l'urna. Da quest avis èn responsabels da pliras vischnancas. Els sa basan sin las cuvertas da votaziun returnadas enfin uss.
La vischnanca da la Val Müstair noda enfin 30% dapli participaziun. La vischnanca da Lumnezia, la vischnanca da Tavau e la vischnanca da Claustra nodan circa 10% dapli. Tut quellas vischnancas elegian novas autoritads communalas.
La vischnanca da Medel e la vischnanca da Scuol hajan survegnì circa 20% dapli cuvertas da votaziun ch'auters onns. Ed era la citad da Glion e quella da Cuira quintan cun ina pli gronda participaziun.