En tut duai quest project custar 43 milliuns, finanzià entras la Stadthalle Chur AG, ed uschia betg chargiar il plan d'investiziun da plirs onns da la citad. Plinavant vegn il project sustegnì da la Banca chantunala dal Grischun, sco era da l'Uffizi per economia e turissem. En detagl vesa la finanziaziun ora suandantamain:
La nova halla possia cuvrir ils custs da manaschi sezza, scriva la citad. Quintian ins dentant vitiers amortisaziuns e tschains, alura dettia ina perdita. Perquai possia la nova Stadthalle be vegnida realisada cun ina contribuziun annuala da 560'000 francs da la citad – a quella contribuziun sto la populaziun dir Gea a l'urna ils 12 da mars.
Nov lieu per la halla
Cura che l'actuala halla è vegnida bajegiada l'onn 1934 sa chattava quella a l'ur da la citad. Perquai che la citad è creschida fitg en quests var 90 onns, n'è il lieu betg pli ideal. I ha paucs parcadis, e la furniziun al lieu sco era il manaschi èn cumplitgads e chars. Sco nov lieu propona la citad la «Obere Au». Quest territori saja bain cuntanschibel cun il traffic public e privat, ed i haja gia radund 900 parcadis. Plinavant n'abita nagin datiers, e direct dasperas è il plaz per events sco per exempel il Big Air.
La posiziun datiers dals indrizs per sport porscha per la citad era la pussaivladad da nizzegiar sinergias. Uschia è il lieu per ina halla d'events gia definì en il masterplan per indrizs da sport ed events Obere Au dal 2016.
Valurisaziun per la regiun Cuira
Cifras exactas sajan grev da calcular, perquai ch'i dependia fitg da l'event. Tar in concert local vegn la valurisaziun oravant tut da l'event sez, tranter auter da mangiativas, bavrondas e la tecnica. Tar in concert naziunal u ina fiera surregiunala vegnian era anc las pernottaziuns u shopping vitiers. La citad quinta cun radund 100'000 visitaders ad onn, e stima la valurisaziun per persuna cun radund 50 francs. Uschia ch'i dess in total da valurisaziun da radund 5 milliuns francs ad onn.
Tge schabegia sch'i dat in Na?
L'actuala Stadthalle sto vegnir stgarpada giu pervi da la nova staziun a val da las pendicularas da Brambrüesch. A partir da la stad 2024 na stat quella betg pli a disposiziun. Sch'i dat in Na a l'urna alura na po la nova halla betg vegnir realisada, uschia ch'i na dat a Cuira ed en l'entir chantun Grischun betg pli la pussaivladad da far events pli grond u fieras. Era per ina situaziun extraordinaria, sco per in center da vaccinaziun, mancass la localitad.
