Da curt è l'applicaziun vegnida publitgada tras la chanzlia federala. La participaziun è voluntaria e tuttina fa mintga chantun part dal project – uschia er il Grischun. La dumengia da votaziuns dals 10 da favrer vegn la nov'app esser l'emprima giada en funcziun. Installar san ins ella gia ussa en «l'appstore» ni «Googleplay».
In'applicaziun cun potenzial
Cun l' applicaziun duessan tut ils resultats esser sveltamain cuntanschibels. Il directur da la chanzlia chantunala dal Grischun, Daniel Spadin, vesa il potenzial da l'app da la Confederaziun.
Igl è bel che tut ils chantuns han fatg part ed igl è propi ina buna chaussa.
Sper publitgar ils resultats sin la pagina d'internet chantunala, vegnan els tramess a Berna, nua ch'els vegnan immediat implementads en l'applicaziun. Per las vischnancas na sa mida nagut. Tenor Spadin na dettia nagina lavur supplementara.
Prest forsa era per votaziuns communalas
Daniel Spadin di che la chanzlia federala ha l'intenziun d'examinar sch'ins pudess anc implementar las votaziuns communalas per ch'il pachet saja cumplets. Sin dumonda da RTR han intginas vischnancas grondas dal Grischun, tranter auter Cuira, Surses, Mustér, Scuol e San Murezzan, mussà interess d'implementar lur resultats era sin «VoteInfo» - dentant cun la premissa ch'i na vegn betg a dar gronda lavur supplementara.
Installar l'app
RR actualitad 17:00