Tgi che guarda l'emprima episoda da la segunda stafla da la seria «Warrior Nun» vegn forsa l'emprim mument ad esser surprais. Ina vusch melodiusa rumantscha – numnadamain quella d'Ursina – inaugurescha la nova stafla. Sia chanzun «Miu cor» è vegnida elegida dals producents da la seria per quest plaz prominent.
Tuttenina audan persunas la chanzun tut enturn il mund
Netflix – ina da las pli popularas paginas da streams da films, serias e documentaziuns – cuntanscha milliuns da persunas mintgadi. Suenter che la stafla è ida online, ha Ursina remartgà ch'i haja dà in augment d'auditurs sin ses profil da Spotify. Ella smina ch'igl è probabel che blers han duvrà «Shazam» per chattar sia musica. Shazam è in'applicaziun sin il telefonin ch'identifitgescha ina chanzun e ses interpret sin fundament d'ina registraziun. Plinavant haja Ursina suenter quest engaschament constatà che las medias èn vegnidas pli attentas sin sia musica e sin ella sco chantadura en general.
Per Ursina è quest engaschament stà in success. Ella saja cuntenta sco sia musica è vegnida implementada en la scena. Quai fetschia era gust da vinavant metter a disposiziun la musica a producents da films e serias – u schizunt realisar ina giada in project nua ch'ella producescha chanzuns exclusivamain per films e serias.
Ina chaussa ha manà tar l'autra
Ursina haja grond plaschair che sia chanzun è vegnida tschernida per ina producziun internaziunala da Netflix. Quai saja adina in zic cletg da far part musicalmain en films gronds.
Jau sun stada al dretg lieu al dretg mument.
Ursina manegia che Netflix haja dumandà si differents interprets ed interpretas en furma d'ina dumonda d'utilisaziun. Or da la schelta saja Netflix lura probablamain vegnì a la conclusiun che la chanzun «Miu cor» giaja il meglier a prà cun la scena.