Alois Zwinggi è led. Per ina perquai ch'il WEF è puspè a Tavau, quai era numnadamain en discussiun. Per l'autra dentant er ch'igl è puspè sco avant la pandemia. El haja anc gì dubis ordavant sche insaquants hajan forsa resalvas da vegnir, dentant il cuntrari, fullas da schefs da stadis ed autras persunas impurtantas e main impurtantas èn d'entupar quests dis a Tavau.
Igl è propi bel dad esser qua puspè il schaner. Jau ma sent fitg agreabel.
Ils nums fitg gronds sco per exempel quel dal president dals Stadis Unids Joe Biden mancan dentant quest onn. Quai na saja dentant nagin problem per il WEF, uschia Alois Zwinggi, anzi. Il WEF 2023 stettia numnadamain er sut il motto «Substanza enstagl da stars». I na dovria exnum ils gronds nums per cuntanscher insatge è el persvas.
Quai è er in zic il problem da quests gronds nums, ch'els han be «statements» a nus vai dentant pli fitg per prender a mauns projects concrets.
Bleras ministras e blers ministers per exempel d'economia, da finanzas u er d'ambient da l'entir mund sajan da la partida. E cun quests emprova il WEF da cuntanscher questa «substanza». Quella dovria quai uss er cun tut questas crisas cun las qualas il mund cumbatta; guerra, pandemia, midada dal clima u er mancanza d'energia. Il WEF porschia perquai quai ch'el porschia gia dapi decennis – in lieu per ch'economia privata, societad civila e regenzas pon s'inscuntrar per chattar schliaziuns.
Ed a propos midada dal clima, respectiv emissiuns da CO2, qua pudess ins renfatschar al WEF morala dubla. Cun tut questas persunas impurtantas che vegnan da l'entir mund mo per in pèr dis en ils culms Grischuns, savens cun aviuns u schizunt jets privats. Dentant quai na lascha Alois Zwinggi betg valair, ins cumpenseschia numnadamain tut las emissiuns da CO2 ch'il WEF generescha – er questas dals viadis cun ils jets privats.