Il salun da coiffeur da Biagio Perrotta è bain a la promenada, dentant betg là nua che la gronda truscha dal WEF è. Perquai na po el er betg dar a tschains ses local e quai na vul el er betg. El vul porscher a ses giasts indigens la pussaivladad da pudair ir tar il coiffeur er durant il WEF, cunquai che blers auters serran durant quests dis.
I n'è betg uschia che nus avain nagut da far, dentant nus avain segir pli pauc da far che normalmain.
I saja dentant fitg stentus, blers giasts dal WEF fetschian giu termins tar el, dentant er tar auters coiffeurs. E lura giajan els simplamain là nua ch'i va il meglier, e na dattan betg giu il termin en ils auters lieus. Perquai haja el anc mintgatant in calender da termins plain – a la fin dal di dentant ina cassa plitost vitta.
Quels fan giu termins en differents lieus, tar mai e tar dus, trais collegas e la finala van els là nua ch'i va il meglier per els.
Perquai haja el er gia purschì ses servetschs directamain en hotels. Dentant er quai n'haja savens betg funcziunà sco giavischà. Gia il viadi en ils hotels saja stentus pervi dal caos da traffic, sper quai haja el savens stuì spetgar fitg ditg sin clientas e clients, uschia ch'era quest model da fatschenta n'ha betg rendì.
Gea, jeu sun led cura ch'il manaschi è puspè normal qua tar nus en fatschenta.
Er hajan ils giasts dal WEF adina prescha e sajan mintgatant er fitg cumplitgads. Perquai lascha el avert ses salun, er sch'i na marscha betg uschè bain durant il WEF. Er saja el disà il WEF cunquai ch'el è creschì si a Tavau, uschia ch'el accepta er il caos che regia dapertut pervi dal WEF. El saja dentant led cura ch'il WEF è passà e sia clientella stabla po puspè vegnir tar el senza problems.
