Siglir tar il cuntegn

Header

cuntegn

WEF «L'anecdota da...»

Durant il WEF rimna RTR a Tavau anecdotas da persunas ch'han per exempel da raquintar d'inscunters spezials, da situaziuns curiosas u auter da quai ch'è capità al WEF.

Regenza dal chantun Grischun

audio
WEF: anecdotas da la regenza grischuna
ord Actualitad dals 20.01.2024. Maletg: RTR
laschar ir. Durada: 3 minutas 9 Secundas.
Jau vai pischà dasper Tony Blair

Tgi pomai ha pischà dasper l'anteriur primminister da la gronda Britannia Tony Blair e tgi ha betg enconuschì in Royal? Ils da la regenza han baininquala anecdota dal forum mundial d'economia.

Franz Sepp Caluori, president dal Cussegl grond GR

Franz Sepp Caluori è per l'emprima giada al WEF.
Legenda: Franz Sepp Caluori è per l'emprima giada al WEF. RTR

Al WEF a Tavau na s'inscuntra betg mo la politica mundiala – mabain era la politica chantunala. Uschia è era là il pli aut grischun: Franz Sepp Caluori. Ed el ha in ni l'auter inscunter che è restà da ses emprim WEF. Gist l'emprima saira ha plaschì bain ad el. Suenter il «Cristal Award» che vegn surdà la saira avant ch'il WEF vegn avert, hai dà in aperitiv, nua che in ni l'auter promi è stà da la partida.

A mai ha plaschì la lucca atmosfera. Nus sa muentavan tranter Ursula von der Leyen, Robert Habeck e Viola Amherd.
Autur: Franz Sepp Caluori president dal Cussegl grond GR
audio
WEF: L'anecdota da Franz Sepp Caluori, president Cussegl grond
ord Actualitad dals 18.01.2024. Maletg: RTR
laschar ir. Durada: 45 Secundas.

Martin Nydegger, schef da Svizra Turissem

Martin Nydegger, Schweiz Tourismus
Legenda: Martin Nydegger è per l'emprema giada al WEF per tegnair pleds e far part a discussiuns. RTR

Dapi sis onns è el il pli aut turisticher en Svizra. Martin Nydegger, il schef da Svizra Turissem è quest onn per l’emprima giada er sez activ al WEF per far part a discussiuns da podium. Ed el conceda ch'el ha spetgà ch'i saja organisà meglier, e ch'el survegnia pli baud las infurmaziuns necessarias.

Al WEF sa mida tut spert, e mintgin va cun quest tempo.
Autur: Martin Nydegger Directur Svizra Turissem

Sch'ins guarda quant ditg oravant che l’infrastructura e la segirtad al WEF vegn organisada, saja quai bain remartgabel ch'el survegnia las infurmaziuns per il podium uschè a curta vista. Dentant a la fin haja quai funcziunà bain ed el haja gì blers inscunters interessants. Ed il turisticher punctuescha ch'il WEF saja per Tavau e la Svizra in super marketing.

audio
L'anecdota da Martin Nydegger, schef da Svizra Turissem
ord Actualitad dals 18.01.2024. Maletg: RTR
laschar ir. Durada: 1 minuta 26 Secundas.

Renata Quinter, stylista al WEF

Renata Quinter è gia dapli blers onns al WEF e schminca onn per onn las persunas las pli dumandadas.
Legenda: Renata Quinter è gia dapli blers onns al WEF e schminca onn per onn las persunas las pli dumandadas. RTR

Ella ha quasi tut ils promis sin la sutga. Renata Quinter è responsabla che las persunas che dattan in'intervista a la televisiun vegnan filmadas da lur meglra vart – ella fa la mascra. Il president da la Frantscha Emmanuel Macron, il fundatur da Microsoft Bill Gates, la scheffa dal fond monetar internaziunal IWF Christine Lagarde … tar ella passan tuts. I dettia ina massa inscunters ch’èn restads. Per exempel quel cun ils frars Wladimir e Vitali Klitschko l’onn passà. L'in enconuschent per sia carriera da boxist, e l’auter il president da la chapitala da l'Ucraina Kiev.

Jau sun fan dals frars Klitschko. Els eran fitg agreabels e nus avain gì interessants discurs.
Autur: Renata Quinter stylista al WEF

In autr’istorgia è era restada en memoria a Renata Quinter. Il maun dretg dal Dalai Lama è vegnì per in'intervista. Ed el era là be cun ina taila tar minus 15 grads. El n’haja betg fraid ha el ditg. Renata Quinter era tut surpraisa e tut ils auters enturn era.

audio
L'anecdota da Renata Quinter, stylista al WEF
ord Actualitad dals 17.01.2024. Maletg: RTR
laschar ir. Durada: 1 minuta 56 Secundas.

Marianna Bott, lavura per ina firma da catering

Marianna Bott è per la segunda giada al WEF per ina firma da catering.
Legenda: Marianna Bott è per la segunda giada al WEF per ina firma da catering. RTR

En ina chasa da trais plauns serva l'Engiadinaisa cafés a schefs d’ina firma internaziunala. Quels han prendì a fit la chasa a la promenada a Tavau, e fan là lur inscunters e tut il temp van en ed or persunas.

Ils tschigulattins svizzers èn fitg dumandads tar las persunas da l'exteriur.
Autur: Marianna Bott lavura al WEF per ina firma da catering

Sper il café datti tschigulattins. Marianna Bott sa regorda da l’onn passà nua ch'ina dunna è vegnida pliras giadas al di per prender in tschigulattin e metteva quellas en sia tastga – quai era sch'ella n’aveva nagins inscunters pli en las localitads. Ils tschigulattins prendia ella a chasa per sia famiglia, ha ditg la dunna. Cunquai che la dunna saja al WEF, haja quella probabel avunda raps per cumprar las tschigulattas, suppona Marianna Bott.

audio
L’anecdota da Marianna Bott che lavura al WEF per ina firma da catering
ord Actualitad dals 17.01.2024. Maletg: RTR
laschar ir. Durada: 54 Secundas.

Reto Branschi, directur da Tavau Claustra Turissem

Reto Branschi, Tourismusdirektor Davos Klosters
Legenda: Reto Branschi va questa stad en pensiun sco directur da turissem, dentant betg sco organisatur da transports dal WEF. RTR

Gia 35 onns lavura Reto Branschi per la destinaziun turistica Tavau Claustra, 16 da quels sco directur. Sper quai ha el dentant ina segunda lavur, el organisescha ils transports per ils giasts uffizials dal WEF. Per schefs da stadis, princessas, CEOs e magari schizunt per retgs e reginas. Ina giada èn il retg e la regina da la Jordania vegnids al WEF.

La regina ha ditg al retg ch'i saja pli cumadaivel senza chadainas, uschia ch'els han midà ed èn lura sesids en il medem auto, dentant senza chadainas.
Autur: Reto Branschi Directur da Tavau Claustra Turissem

Tenor lur reglas na dastgà il pèr betg seser en il medem auto. Cunquai ch'igl ha dentant dà in incap cun in auto, è quel lura vegnì remplazzà cun in auto cun chadainas. Ma quai n'ha betg plaschì a la regina, uschia ch'els han la finala duvrà il medem auto.

audio
L'anecdota da Reto Branschi, directur da Tavau Claustra Turissem
ord Actualitad dals 15.01.2024. Maletg: RTR
laschar ir. Durada: 1 minuta 51 Secundas.

Susanne Giger, stada 18 onns per SRF al WEF

Susanne Giger, ehemalige SRF Journalistin
Legenda: Susanne Giger en il studio provisoric dad SRF ed RTR a Tavau. RTR

Susanne Giger è stada per SRF durant blers onns al WEF sco schurnalista, ed avess pudì raquintar bleras istorgias da lungas notgs da festa tranter ils ritgs e pussants. In mument ch'è dentant restà ad ella è, ch'ella ha bunamain derschì Brad Pitt ed Angelina Jolie ch'eran da viadi a Tavau cura ch'ella era en prescha.

Dà en egl a mai è che Brad Pitt è gnanc uschè grond sco che jau hai pensà, ed era ch'els vesevan or sco in pèrin tut normal.
Autur: Susanne Giger Durant 18 onns stada al WEF per SRF

Senza prender resguard è ella currida tras in suler d'in hotel, perquai ch'ella stueva ir a far ina intervista. E malgrà che persunal da segirezza vuleva franar ella n'è quai betg gartegià – uschia ch'ella è siglida en il pèrin da Hollywood. In pèrin ch'è insumma betg crudà en egl ad ella – tut normal.

audio
L'anecdota da Susanne Giger
ord Actualitad dals 15.01.2024. Maletg: RTR
laschar ir. Durada: 1 minuta 50 Secundas.

L'electricist Theo Cavegn da Breil

Theo Cavegn, Elektriker für's Kongresszentrum am WEF in Davos.
Legenda: Theo Cavegn avant il center da congress a Tavau. RTR

Theo Cavegn è quest onn per la novavla giada stà in da radund 50 electricistas ed electricists ch'han installà cabels e bischlas en il center da congress. Avant in pèr onns ha el gì servetsch da pichet durant il WEF e dalunga è el vegnì clamà ina bun'ura pervia d'in incap. La stanza che Donald Trump e sia entourage da radund 50 persunas aveva reservà per ensolver n'aveva nagin'electricitad pli. Ina da las dunnas ch'era vid far ensolver aveva derschì aua sur ina bischla e la segiranza è crudada or.

Il Trump era là dasperas e lura hai jau ditg: «Sorry, sorry i come, i come. No problem!»
Autur: Theo Cavegn Electricist cun blera experientscha al WEF

Aifer diesch minutas saja il problem stà schlià e Donald Trump e sia entourage han puspè gì café chaud grazia a Theo Cavegn. Donald Trump saja stà ruassaivel e curtaschaivel ed haja ditg: «Good man, good man». Quai saja propi stà in inscunter tut spezial.

audio
Anecdotas da Theo Cavegn WEF
ord Actualitad dals 15.01.2024. Maletg: RTR
laschar ir. Durada: 1 minuta 58 Secundas.

RTR actualitad 12:00

Artitgels legids il pli savens