Il project da retschertga è vegnì fundà tranter auter da l’institut federal da perscrutaziun da guaud, naiv e cuntrada WSL. Per mantegnair la trapla sin il Weissfluhjoch collavura il WSL ensemen cun l'Institut per la perscrutaziun da naiv e lavinas SLF a Tavau.
Sper la trapla sin il Weissfluhjoch mantegna il project passa 40 ulteriuras traplas en l'entira Svizra per chattar or da differents lieus tge insects ch'i dat là e quants.
Gia avant 23 onns han ins tschentà en ils medems lieus traplas d'insects ed ussa vuless ins cumparegliar ils resultats actuals cun quels da lez temp. Uschia pon scienziads giuditgar l'influenza da la stgaudada dal clima durant ils ultims onns sin la populaziun d'insects.
-
Bild 1 von 4. Dr. Anne Kempel che collavura tar l'institut SLF a Tavau, qua cun preparar la trapla dal fund sin il Weissfluhjoch. Bildquelle: JOCHEN BETTZIECHE/SLF.
-
Bild 2 von 4. Insects sgulants vegnan tratg da la colur melna dal dratguir, fruntan sin la schiba da plexiglas e crodan en il liquid da tschiffada. Bildquelle: JOCHEN BETTZIECHE/SLF.
-
Bild 3 von 4. Dr. Anne Kempel emplenescha il liquid da tschiffada, quel consista or d'aua ch'è tschuffa cun in pau chemia per rumper la tensiun da la surfatscha e per mantegnair l'aua da la miffa. Bildquelle: JOCHEN BETTZIECHE/SLF.
-
Bild 4 von 4. Cun questa trapla vegnan tschiffads insects che vivan per terra. Las traplas a Tavau èn vegnidas svidadas ina giada l'emna, ils insects ch'ins ha tschiffà èn lura vegnids numnads, mesirads e conservads. Bildquelle: JOCHEN BETTZIECHE/SLF.
Cuntrari a las regiuns pli bassas spetga Dr. Anne Kempel en las muntognas in augment da la populaziun d’insects. Quai perquai che tras il stgaudament climatic pon adina dapli plantas crescher er en regiuns pli autas – ed ils insects suondan alura questas plantas. Perquai che la trapla per insects sgulants sin il Weissfluhjoch pudess tras il clima criv rumper durant l'enviern, è ella entant gia vegnida demontada.
Per ils proxims trais onns vegn ella lura puspè reconstruida durant la stagiun da stad per cumplettar ils studis actuals. Suenter quai pon quests resultats vegnir cumparegliads cun quels da la perscrutaziun pli veglia. E pir lura pon ins dir tge novs insects che vivan qua e co ch'i vesa ora cun la populaziun d'insects en Svizra en general.