Bandieras dals Stadis Unids e da Texas ch'èn fermadas vi da la saiv sgulatschan en il vent. I savura da chavals, lain e gril. La musica da country contribuescha a l'atmosfera da western. Andy Hartmann, il president dal comité d'organisaziun da «Western City» è medemamain sa costumà en stil da western: chapella da cowboy, fazielet cotschen, chamischa e tschinta.
Il stil da viver cumadaivel e simpel, la musica da country ed il material lain è quai che ma plascha vi da la cultura da country.
Tras viadis a Texas, en l'America en general ed en il Canada ha Andy Hartmann gì la chaschun da visitar uschenumnads «ghost towns». Cura ch'el ha lura visità en Svizra en l'Emmental ina «Western City» temporara, ha el decidì d'era organisar ina giada ina tala.
Sinaquai ha il process da lavur cumenzà che ha durà in onn e mez e cumpigliava la tschertga d'in plaz adattà, l'organisaziun da l'infrastructura e da la finanziaziun. Uss è la citad gia vegnida bajegiada per la segunda giada entaifer circa trais emnas a Malans. Ella cuntegna ina tribuna, nua ch'i vegn sunà e chantà en il stil da country, divers saluns e butias ed in prà da chavals. Cun guardar pli exact scuvran ins era in u l'auter detagl – per exempel craps-fossa americans.
Chapella da cowboy/cowgirl sco premissa per entrar?
Contemplond ils giasts vesan ins glieud costumada, ma era persunas vestgidas sco ti ed jau. Ina dunna manegia ch'i saja bel da vesair ils costums, ma ch'ins sa sentia era bain senza. Tenor Andy Hartmann na datti betg «il tipic osp» – quai dependia dal temp dal di.
Il suentermezdi è il program da famiglia – la saira quel per la scena.
Uschia ha er mintga giast ses agen highlight: Ina mattetta sa legra d'ir a chaval, in mattet da tschertgar aur, ina dunna da sautar ed ad in'autra plascha l'atmosfera paschaivla.
Café original
Tgi che tutga en mintga cas tar ils passiunads e las passiunadas da western èn Monika ed Andreas Schöpfer. Entamez il plaz stat lur «chuckwagon» – in tipic car en il stil da western, nua ch'il pèr serva vair café da cowboys e cowgirls che vegn cuschinà sin il fieu.
Tal café vegniva gia preparà la damaun baud cura ch'ins era sin via en la preria cun ils «chuckwagons».
Monika ed Andreas Schöpfer èn sa vestgids en il stil da western – el cun libroc e chapella, ella cun jupe e fazielet da chau cun rischas. Sch'i va per il western èn els profis – dapi 30 onns sa fatschentan els cun la tematica. Dapi 20 onns han els lur atgna fatschenta cun café mobil da western.
Ils giasts sajan dentant er quels e quellas che dettian l'atmosfera a la citad, manegia Andy Hartmann riend. Uschia pon ins passar tras ina porta ed entrar per in mument en in mund lontan.