Il term «zero waste» signifitgescha nagin rument e nagin sguaz. Viver tenor quest principi è fitg pretensius, cun quai ch'igl è pli u main impussibel da betg producir rument. Laura Zangger, oriunda da Samedan en Engiadin’Ota, stat cun sia famiglia a Cuira. Els emprovan da cumprar en uschia ch'i dettia pauc rument. Er Gion Duno Simeon, oriund da Lantsch en Surmeir, viva tenor quest principi. Tuts dus van dapi trais onns regularmain a far cumissiuns en la butia che venda products senza emballascha a Cuira.
Viver conscient dal rument e sguaz
Gion Duno Simeon e sia famiglia han vis blers differents lieus sin l'entir mund ed uschia er tut differentas manieras da viver. Questas experientschas han gì ina gronda influenza sin lur conscienza per l'ambient.
Nus avain vis ch'igl è impurtant per la vita e ch'ins sa atgnamain laschar.
Laura Zangger e sia famiglia giuvna vulevan empruvar or ina giada quest principi da producir uschè pauc rument sco pussaivel. Cun quai aveva ella badà tge massa che vegn bittada davent. Laura Zangger ha badà en quests onns che l'organisaziun è fitg impurtanta, cun trais uffants ed ils geniturs che lavuran. Ins stoppia planisar in'emna avant ch'ins vul mangiar e quant, be uschia èsi pussaivel da reducir la massa dal rument.
Tuts dus dovran satgets da taila e magiels u auters recipients per ir a far cumissiuns. Dapi ch'els cumpran en conscientamain vesan els resultats. Tar il pèrin Simeon tanscha in satg da rument pitschen per pli che 10 dis. La famiglia Zangger ha pli baud duvrà mintga emna in satg da 35 liter, ussa bastan 17 liters ina fin duas emnas.
Stizun senza emballascha
La butia Oba aba en la citad veglia da Cuira venda products tenor il principi «zero waste». Trais onns suenter l’avertura sa Andrina Caprez, confundatura da la stizun, guardar enavos sin in svilup. La stizun ha pudì bajegiar si ina clientella da tschep, persunas tut diversas. L’onn 2018 cur che la conscienza per l’ambient era fitg actuala han las trais fundaturas avert la butia Oba aba. Il 2020 han ellas gì il pli grond success. Quest schlantsch è vegnì franà da la pandemia. Or da l'actualitad porschan er concerns gronds products senza pachetadi. Per il progress da reducir la massa dal rument è quai ina buna chaussa. Per ils proxims onns spereschan ellas da pudair salvar la clientella fidaivla e ch'i cuntanschan adina novas persunas che s'interessan per il tema.
Nus avain cumenzà fitg pitschen, be cun il pli necessari ed avain lura bajegià or il sortiment.
