La 5avla unda da la pandemia da corona chaschunia in’unda dad annullaziuns tar hotels ed auters manaschis d’alloschament. Quai scriva l’associaziun da branscha «Hotelleriesuisse».
Ils ultims dis saja la situaziun da las cudeschaziuns tar hotels vegnida mendra. Dad ina vart pervi da las reglas da curontina che sajan vegnidas pli rigurusas per burgais da plirs pajais che vulan vegnir en Svizra. Da l’autra vart vegnan blers eveniments da firmas ed er festas da Nadal spustadas a curta vista. En vista a la stagiun d'enviern stoppian ins evitar in lockdown – pretenda Hotelleriesuisse.
Per la gronda part dals hotels svizzers saja ina stagiun d'enviern che funcziuneschia centrala. La politica stoppia prender mesiras omogenas che valian per tut las branschas per dar dumogn a la pandemia. Il passa haja mussà ch'i portia pac sche mintga chantun decidia auter. Il medem temps duajan ins prolungar las mesiras cumprovadas per sustegnair vinavant ils manaschis.