Resursas fossilas èn limitadas. Ed en general vala, pli limità ch'ina chaussa è, pli chara ch'ella daventa. In trend ch'ins po persequitar dapi onns tar l'ieli. I dat dentant a curta sco a lunga vista pussaivladads co ch'ins po spargnar daners sch’i va per stgaudar las atgnas quatter paraids.
Alternativas ecologicas
Sper il stgaudament d’ieli è quel da gas il segund pli popular med per stgaudar l’abitaziun en Svizra. Tenor SRF vegnia il gas savens vesì sco varianta pli ecologica che l’ieli. La realitad mussa dentant che gas n’emetta betg bler pli pauc emissiuns da CO2 ch’ieli. Pli ecologic sajan perencunter in stgaudament d'energia geotermica, in’implant da fotovoltaica u collecturs da sulegl. Enfin oz han radund 30% da tuts possessurs da chasa midà sin ina da quellas alternativas ed il trend va vinavant. Tgi che desista actualmain d’ina alternativa ecologica po era cuntanscher bler cun ina meglra isolaziun. Tenor SRF possian ins spargnar cun ina buna isolaziun radund la mesadad dals custs per stgaudar ch’ins avess uschiglio.
Cun pitschens trics schanegiar la bursa
Era per locaturs che na pon betg directamain influenzar il stgaudament u l’isolaziun datti pussaivladads per spargnar daners. In tip è da betg stgaudar en mintga chombra tuttina ferm, mabain be là nua ch’ins sa tegn si il pli bler. Medemamain cusseglia SRF da betg trasora midar il regulatur dal stgaudament, mabain da be ina giada drizzar quel. Uschia resta la temperatura constanta en la stanza. In auter tip èsi da betg avair avert las fanestras. Tgi che dovra aria frestga duaja laschar en l’aria spert ed intensiv e silsuenter puspè serrar la fanestra.